Robert Budina ka lindur në Korçë, Shqipëri dhe punon si producent, regjisor, skenarist i pavarur filmi. Është diplomuar në Akademinë e Arteve, Regji Teatri. Ai ka drejtuar dhe shkruar disa pjesë teatrale.

Së bashku me Sabina Kodrën formuan kompaninë ERAFILM PRODUCTION në vitin 2001. Roberti gjithashtu ka mbuluar role të shumta si producent, producent ekzekutiv dhe mbikëqyrës i prodhimit në bashkëprodhime të ndryshme ndërkombëtare.

Roberti bëri regjinë e filmit të tij të parë të shkurtër “LULEBORË”, duke marrë pjesë në 40 festivale filmi në të gjithë botën dhe duke marrë disa çmime si filmi më i mirë në Algarve, Portugali dhe aktori më i mirë mashkull në Tanger, Marok. “AGON” filmi i parë artistik i Robert Budinës, u shfaq në më shumë se 30 festivale në mbarë botën dhe u vlerësua si skenari më i mirë në SEE a PARIS.

Agon ishte përzgjedhja shqiptare për OSCARS në vitin 2014.

Filmi i dytë artistik i Robert Budinës, Streha Mes Reve pati premierën botërore në Festivalin e Filmit Tallinn Black Nights në Estoni, në Garën Zyrtare, Nëntor 2018. Ky film mori pjesë në shumë festivale të tjera në mbarë botën duke fituar çmime si, Çmimi Global Visual në Cinequest Film & Creativity Film Festival në San Jose, SHBA, Filmi më i mirë në Festivalin Ndërkombëtar të Filmit La Valletta, Maltë, Filmi më i mirë, Aktori më i Mirë, Aktorja më e Mirë në PriFilmFest, Kosovë, Muzika më e mirë dhe Miksi i zërit në Festivalin e Filmit Mediteranian Valencia, Spanjë. Streha Mes Reve është filmi i parë në gjuhën shqipe i shpërndarë në territoret gjermane për më shumë se gjashtë muaj, duke mbledhur rreth 20.000 spektatore, Shqipëri 5.000 spektatorë. Filmi u shfaq në Digitalb Albania, Tv Kombëtar Shqiptar RTSH dhe HBO.

Seriali KATORI I PUSHTETIT me skenar dhe regji nga Robert Budina në vitin 2022 u transmetua në televizionin më të madh kombëtar shqiptar KLAN, me një ndjekje mesatare të audiencës prej 35%.

Robert Budina është aktualisht në postproduksion të filmit të tij të tretë artistik Pikë Uji.